A negra terra - Manuel Rivas

Samba 1925 - Di Cavalcanti
Emiliano Augusto Cavalcanti de Albuquerque e Melo
(Rio de Janeiro 6 Set. 1897 - Rio de Janeiro 26 Out. 1976)

De falar, falarei coa terra.
A terra verdadeira,
a negra terra
onde prende a raíz.
A terra que se pisa.
A terra que se queima e que se crava.
Ese enorme lenzo onde o home debuxa o seu capricho.
Onde o home se perde e se revolve en sombras.
A negra terra,
ese corpo de puta vella con dentes amarelos de tabaco,
con olleiras negras de tan azuis.
De falar, só con ela falarei
e falarei coas mans,
docemente coas unllas,
coa paixón dun amante,
como falan, cando albiscan a morte, os
                                xabaríns feridos.
De falar, falarei coa terra.
Coa terra, con esa negra terra
que cospe, como sangue do peito, primaveras.

Manuel Rivas Barrós (Corunha, 26 de Outubro de 1957)
Poema extraído daqui